نزّلتِ دمعى مرِّتين
مرَّه عليك…
ومرَّه مابينى وبين
ألبى الحزين
مسكين….
صعبان عليه إنه يخون
حب السنين
تفتكرى ينسى..!
أو ممكن يلاقى
ف بحور هواك شط..
ومرسا….
عُمرْ ألبى ف يوم ميأسى
ياللى كان إسمك..حبيبى
وحتى لو هايعيش غريق
وبتمنَّى…
يموت مشنوق
بحبال هواك
على إديك… يام ألب رقيق
على الأقل
يلقى رب كريم
يشكى…ويصفى
أحسن كتير..إنه يكون مهموم
او يكون..
فى منفى…جوَّا منفى
سألته….
قاللى كلمتين
بإنه عمره فى يوم مايأسى
وقاللى برضو..
مش هاينسى
عطش السنين…
ولا حتَّى دمع المرتين
من ألب ألبه
وم العنين
لكن…!
ماهوش يخون
جمال نصر